Në Ditën e Biodiversitetit, ishte kënaqësi të festohej me nxënësit entuziastë të shkollës “Hamdi Rrapi” në Gjorm. Ishte një ditë e mbushur me mësime dhe krijimtari, ku nxënësit u përfshinë në diskutime mbi mbrojtjen e mjedisit, me fokus të veçantë te shpendët shtegtarë. Ata eksploruan kushtet e nevojshme për migrimin dhe ushqyerjen e shpendëve gjatë udhëtimeve të tyre të gjata deri në destinacionet e fundit.
Nxënësit u mahnitën kur mësuan se insektet janë burimi kryesor i energjisë për shpendët shtegtarë. Për t’i ndihmuar këto krijesa të rëndësishme, ata ndërtuan “hotele insektesh” prej kartoni dhe gjethet e bimëve. Këto streha të vogla janë krijuar për të mbrojtur dhe inkurajuar riprodhimin e insekteve, të cilat luajnë një rol kyç në zinxhirin ushqimor.
Dita e Biodiversitetit, që festohet më 22 maj, është një kujtesë e rëndësisë së diskutimit dhe adresimit të sfidave të biodiversitetit. Është një ditë për të reflektuar mbi mënyrat se si mund t’i zgjidhim këto probleme për të krijuar një mjedis më të ekuilibruar dhe të qëndrueshëm për të gjitha qeniet e gjalla.
