Më 26 mars u zhvillua takimi i dytë i Komitetit Drejtues të projektit ISCCA (Menaxhimi i qëndrueshëm i korridoreve ekologjike në zonën e Polis-Valamarë-Rungaje-Moravë-Gramoz), një nismë e rëndësishme për ruajtjen e biodiversitetit dhe menaxhimin e qëndrueshëm të ekosistemeve natyrore në këtë rajon të pasur me vlera mjedisore. Takimi u organizua me pjesëmarrjen e përfaqësuesve nga Prefektura e Elbasanit, Administrata Rajonale e Zonave të Mbrojtura (AdZM), përfaqësues të Bashkive përkatëse, si dhe të Universitetit të Elbasanit.
Gjatë këtij takimi, EcoAlbania prezantoi versionin final të Planit të Veprimit për projektin, një dokument strategjik që përcakton masat dhe aktivitetet e planifikuara për të siguruar mbrojtjen dhe zhvillimin e qëndrueshëm të zonave të përfshira në projekt. Plani i Veprimit do të shërbejë si një udhërrëfyes për implementimin e aktiviteteve në periudhën në vijim, duke synuar të forcojë mekanizmat e bashkëpunimit dhe të zbatojë politika efektive për ruajtjen e natyrës.
Një nga pikat kryesore të diskutimit ishte rishikimi dhe përmirësimi i Marrëveshjes së Bashkëpunimit (MoU) midis aktorëve të ndryshëm institucionalë dhe organizatave të përfshira në projekt. Kjo marrëveshje synon të forcojë partneritetin ndërmjet institucioneve lokale dhe rajonale, duke mundësuar një koordinim më të mirë të përpjekjeve për mbrojtjen e mjedisit dhe zhvillimin e qëndrueshëm.
Në takim u diskutuan gjithashtu hapat e ardhshëm për realizimin e objektivave të projektit, përfshirë rritjen e ndërgjegjësimit mjedisor mbi rolin e korridorit ekologjik, promovimin e praktikave të qëndrueshme të përdorimit të burimeve natyrore, përfshirjen e koncepteve të konektivitetit ekologjik, shërbimeve të ekosistemit dhe zgjidhjeve të bazuar në natyrë në strategjitë dhe planifikimin territorial të Bashkive, si dhe integrimin e komunitetit në proceset vendimarrëse gjatë periudhës së zbatimit të planit për CCA (Connectivity Conservation Area) “Polis-Valamarë-Rungajë-Moravë-Gramoz”.
Përmes këtij bashkëpunimi të ngushtë dhe përpjekjeve të përbashkëta, projekti ISCCA po ecën përpara me hapa konkretë drejt realizimit të objektivave të tij. Ruajtja dhe menaxhimi i qëndrueshëm i korridoreve ekologjike në këtë rajon është një prioritet kyç për të garantuar një të ardhme më të gjelbër dhe më të qëndrueshme për brezat e ardhshëm.
