Progonat, 5 dhjetor 2023. Në zemër të Progonatit, nxënësit e shkollës “Asim Zeneli” festuan Ditën Botërore të Dheut në një mënyrë unike dhe me ndikim për të ardhmen duke mbjellur pemë në zonën përreth.
Dita nisi me një orë edukimi mjedisor, e ndjekur nga një seri lojërash edukuese tërheqëse në natyrë, për të krijuar një ndjenjë përgjegjësie ndaj mbrojtjes së planetit tonë. Ndërsa pjesa më interesante e aktivitetit ishte eksperienca praktike e mbjelljes së blirit (Tilia cordata) , kumbullës së kuqe (Prunus Cerasifera) dhe fidanëve, duke e shndërruar oborrin e shkollës në një oaz të lulëzuar të biodiversitetit. Nisma synonte jo vetëm të zbukuronte mjedisin, por edhe të jepte mësime të vlefshme për rëndësinë e Tokës në ruajtjen e jetës së egër.
Nxënësit, ruajtësit e të ardhmes, mësuan aftësi thelbësore si kujdesi i duhur dhe teknikat e ujitjes, veçanërisht të rëndësishme gjatë periudhave të thatësirës. Këto mësime praktike shërbyen si një kujtesë për rolin jetësor që luan toka në rritjen dhe mirëqenien e të gjitha gjallesave.
Suksesi i këtij eventi nuk do të ishte i mundur pa mbështetjen e administratës së Progonatit, angazhimi i së cilës për të nxitur një komunitet më të gjelbër ka qenë i palëkundur. Një falënderim i veçantë i drejtohet shkollës “Asim Zeneli” që e përqafoi këtë nismë me entuziazëm dhe përkushtim.
Ndërsa reflektojmë për këtë festë të Ditës Botërore të Dheut përshëndesim përpjekjet e këtyre mendjeve të reja dhe frymën bashkëpunuese të komunitetit. Së bashku, ata jo vetëm që kanë pasuruar mjedisin e tyre shkollor, por kanë mbjellë farat e ndërgjegjësimit dhe përgjegjësisë.
Mësues apo drejtues shkolle dhe që kanë dëshirë të zhvillojmë orë edukimi mjedisor në shkollën e tyre, mund të bëhen pjesë e projektit të edukimit duke kontaktuar koordinatoren e projektit Marina Xhaho në adresën e-mailit: [email protected].
Projekti “Edukimi mjedisor në shkollat 9 vjeçare në Shqipëri”, synon të rrisë ndërgjegjësimin mjedisor nëpërmjet edukimit të të rinjve përmes aktiviteteve në të paktën 35 shkolla të vendit.
