Organizatat që veprojnë përgjatë basenit të lumit Vjosë, pjesë e Rrjetit të Shoqërisë Civile të Basenit të lumit Vjosa (VCSN) zhvilluan një vizitë shkëmbimi në Janinë dhe në Parkun Kombëtar të Pindusit në Greqi më 27 dhe 28 Mars, me synimin për të forcuar bashkëpunimin rajonal dhe për të ndarë përvoja të vlefshme mbi mbrojtjen e lumenjve dhe menaxhimin e qëndrueshëm të burimeve natyrore.
Gjatë kësaj vizite, përfaqësuesit e organizatave shqiptare patën mundësinë të takohen dhe të bashkëbisedojnë me përfaqësues të organizatave greke MedINA dhe Pindos Perivallontiki, të cilat kanë një përvojë të gjatë në fushën e ruajtjes së natyrës, angazhimit të komunitetit dhe hartimit të politikave të qëndrueshme për mbrojtjen e mjedisit. Diskutimet u përqendruan në mënyrat më efektive për të mbrojtur lumin Aoos – vazhdimin e Vjosës në territorin grek – dhe rëndësinë e bashkëpunimit ndërkufitar për mbrojtjen e ekosistemeve të përbashkëta. Përfaqësuesit e këtyre organizatave greke ndanë eksperiencat e tyre në mbrojtjen e lumit Aoos. Diskutimet ndërthurën ndarjen e përvojave dhe zgjidhje të ndryshme praktike të bëra në kuadër të punës së përditshme.
Pjesë e rëndësishme e programit ishte eksplorimi i Parkut Kombëtar të Pindusit, ku pjesëmarrësit u njohën nga afër me praktikat më të mira të ruajtjes së biodiversitetit dhe menaxhimit të qëndrueshëm të zonave të mbrojtura. Kjo përvojë u vlerësua si shumë frytdhënëse për të nxitur aplikimin e modeleve të ngjashme në territorin shqiptar. Ishte me interes për pjesëmarrësit të kuptonin ligjet e vendosura nga shteti për mbrojtjen e parqeve kombëtare sëbashku me ligjet e Bashkimit Europian.
Një tjetër moment i veçantë i vizitës ishte takimi me Kryetarin e Bashkisë së Zagorisë, z. Georgios Soukouvelos, ku u diskutua mbi rolin kyç të qeverisjes vendore në ruajtjen e burimeve natyrore dhe rëndësinë e ndërtimit të partneriteteve ndërkufitare. Bashkëbisedimi tregoi interesin e përbashkët për forcimin e marrëdhënieve dhe për ndërtimin e një vizioni të përbashkët për ruajtjen e lumenjve të egër në rajon.
“Për çdo veprim që ndërmerr Ministria apo Agjencia e Mjedisit, bashkëpunimi me Bashkinë është i domosdoshëm – gjithmonë kërkohet leje dhe dakordësi nga pushteti vendor.” u shpreh Kryetari i Bashkisë së Zagorisë, Georgios Soukouvelos.
Ai theksoi gjithashtu rëndësinë e përfshirjes së rajonit në UNESCO: “Jemi pjesë e UNESCO-s vetëm prej një viti, dhe kemi pasur mbështetje të plotë nga qeveria qendrore. Jemi e vetmja bashki në Greqi që ka status të dyfishtë – natyror dhe kulturor. Ky është një avantazh i madh, pasi pritet rritje e turizmit dhe vizitueshmërisë vit pas viti.”
Bashkëpunimi 2 palësh Shqipëri – Greqi ka qënë një komponent i rëndësishëm për projektin ESPID4Vjosa, duke synuar të forcojë bashkëpunimin në menaxhimin efektiv dhe të qëndrueshëm të Basenit Ujor Vjosë-Aoos.
